Epi quere illar os xogadores da "axitación" que hai na contorna do equipo

O Obradoiro xoga o venres o partido máis importante das dúas últimas tempadas. Nun principio Diego Epifanio contará con todos os seus xogadores, pero é imposible que o equipo se ille do ambiente que se vive na cidade, polo que o traballo pode ser máis de mentalización que físico.

“Esa é a clave. Isto é unha semana máis de traballo. Evidentemente, a contorna, as expectativas, a prensa... Todo o que rodea ao vestiario ten unha axitación maior que na xornada catro, por dicir unha. Pero nós sabemos que o noso traballo ten que ser o de seguir mantendo o máximo foco de atención no vídeo, de intentar resolver todas as nosas dúbidas na pista, de que nos vai a esixir moita concentración e moito esforzo físico.

A expectación que esperta este último encontro ligueiro fai que as peticións de entradas sexan múltiples.

“Non levo a conta, pero creo que poderiamos encher dúas veces Sar, seguramente, pola petición de entradas de todo o mundo que quere vir, pero nós temos que centrarnos no que está nas nosas mans, que é traballar esta semana".

En canto ao rival, Guipúscoa, Epi cre que é un equipo que mellorou moito e do que ninguén pode fiarse. Epi podería lograr o seu cuarto ascenso a ACB.

O partido poderá seguirse en directo a través da G2.