Epi, ante o momento decisivo: "Isto é como o Camiño, sofres moito e tamén gozas"
O técnico do Obradoiro espera contar con Kravic, que quedou mancado no partido ante o Estudiantes
O encontro poderá seguirse en directo pola G2 e AGalega.gal
O Monbus Obradoiro visitará este sábado, ás 19:00 horas e en directo pola G2, o Grupo Alega Cantabria en Torrelavega, no último desprazamento da liga regular e nunha cita chave dentro do tramo decisivo polo ascenso directo.
Diego Epifanio compareceu cunha metáfora moi santiaguesa para explicar como vive o grupo este final de curso.
“Isto é como o Camiño de Santiago. Cando estás inmerso no camiño hai momentos nos que sofres do copón, hai momentos nos que entendes por que estás aquí e fas todo o posible por desfrutar da experiencia”, reflexionou o técnico.
O adestrador do Obradoiro insistiu en que a proximidade do desenlace non alterou a rutina do equipo. A falta de dúas xornadas, co conxunto compostelán dependendo de si mesmo para acabar na primeira posición, Epi asegurou que o vestiario mantén o mesmo método de traballo.
“Non cambiou nada. Foi unha semana normal”, explicou.
Un dos factores importantes do partido será a presenza dunha importante representación de afeccionados obradoiristas en Torrelavega. Epifanio agradeceu o esforzo de quen aproveitará a ponte para acompañar ao equipo nun desprazamento importante.
“Para nós é moi importante. É o último partido da liga regular fóra de casa e necesitamos o seu apoio”, afirmou.
Epi espera contar con Kravic que quedou mancado no partido ante o Estudiantes.
