Entran en vigor as sancións polo mal uso do abono gratuíto de Renfe
Quen reserve praza e non viaxe en tres ocasións perde o abono e a fianza
A maioría dos viaxeiros apoia que se endurezan as normas, pero dubidan do sistema de control nalgúns tramos
A Plataforma Tren Media Distancia Galicia cre que cancelar a reserva con dúas horas de antelación prexudica os usuarios habituais
Segundo Renfe, un 10 % dos titulares do abono gratuíto reservaba praza e logo non viaxaban nela. Pasaxeiros pantasma que desde hoxe serán sancionados coa retirada da fianza de 20 euros e o abono, que non poderán recuperar ata pasado un mes.
"Eu creo que a partir de agora haberá máis dispoñibilidade, antes era difícil ter sitio porque a xente collía prazas e logo non viaxaba".
"Eu reservei onte para estes días e atopei praza, creo que vai funcionar bastante ben", opinan algúns viaxeiros.
En xeral, os usuarios apoian o endurecemento das normas para evitar os abusos. Pero tamén xorden dúbidas sobre como van controlar a ocupación real das prazas naqueles tramos onde non hai tornos nin pasan os revisores.
"Moitas veces a Lugo non hai revisor nin pasan código, entón que vai pasar se viaxo tres veces pero non o saben?", pregúntase unha usuaria.
"Sen máis interventores, nin persoal no despacho de billetes, sen reforzar a web e a APP, non sei como van controlar se as prazas están bloqueadas por fallos ou por un mal uso", di Iria Méndez, a voceira da Plataforma Tren Media Distancia Galicia.
Desde a Plataforma Tren Media Distancia Galicia piden tamén melloras na aplicación da xestión das reservas para evitar colapsos. Amais din que a nova obriga de cancelar a reserva cun mínimo de dúas horas de antelación prexudica os que se moven en tren ao traballo.
"Normalmente chegas cinco minutos antes á estación, é unha medida inoperante e inxusta para o usuario habitual" engade Roberto Boullón, outro membro da plataforma.
Aproban que haxa controis, pero desde a plataforma son máis partidarios de encarecer a fianza para disuadir os viaxeiros pantasma.
