Renfe rexistra un récord de viaxeiros entre Galicia e Madrid tras recortar paradas
Renfe asegura que o 7 de xullo bateu marcas ao transportar nunha soa xornada neste corredor máis de 13.000 persoas
O número de pasaxeiros semanais mantívose por riba dos 75.000 no primeiro mes, "outro récord para este corredor"
O trazado de alta velocidade Galicia-Madrid bateu marchas tras a reorganización de frecuencias e paradas posta en marcha o 9 de xuño, segundo informa Renfe nun comunicado.
As modificacións nesa liña xeraron malestar entre viaxeiros de Castela e León pola eliminación de varias paradas, concretamente, en Sanabria (Zamora), Medina del Campo (Valladolid) e Segovia.
Con todo, o operador ferroviario público asegura que o reaxuste incrementou a pasaxe en Castela e León -un 46 % máis en Zamora, un 25 % en Medina del Campo e un 10 % en Sanabria-, as zonas afectadas pola supresión.
Ademais, remarcou que o 7 de xullo a compañía rexistrou un récord ao transportar nunha soa xornada neste corredor máis de 13.000 persoas.
A estrea de máis trens S106 e a oferta de máis prazas, xunto ao reforzo dos AVLO no territorio e o recorte dos tempos de viaxe, supuxeron un aumento de viaxeiros tanto en Galicia coma en Castela e León e en Madrid.
O número de viaxeiros semanais, pola súa banda, mantívose de xeito sostido por riba dos 75.000 ao longo do primeiro mes, o que representa "outra marca para este corredor".
Incremento por estacións
O número de pasaxeiros en Zamora medrou no primeiro mes un 46% (ata os 33.119 viaxeiros) respecto aos valores de 2024; Medina del Campo AV/AV mellorou un 25% (2.775); Sanabria AV/AV, un 10% (1.819); e Segovia-Guiomar, un 1% (17.263).
A Coruña obtivo o maior incremento no número de viaxeiros de todo o corredor cun total de 67.223, un 97% máis. En Santiago de Compostela o aumento foi de 85% (94.511 viaxeiros) mentres que en Vigo-Urzáiz foi de 61% (38.803).
A Gudiña-Porta Galicia creceu un 57% (preto de 4.000), mentres que Vilagarcía de Arousa e Pontevedra, un 46% (máis de 7.500) e un 37% (23.331), respectivamente; e Ourense, pola súa banda, contabilizou unha suba do 14% (94.952).
Madrid Chamartín-Clara Campoamor foi a estación cun maior número de desprazamentos en termos absolutos: 264.289, un incremento do 49%.
