Entran en vigor as medidas para evitar a entrada en Galicia da dermatose nodular bovina
Quedan prohibidos, durante polo menos tres semanas, os mercados de gando, feiras, certames e exposicións
A Xunta pide limitar ao máximo os movementos de gando para evitar a entrada dunha enfermidade que xa provocou en Xirona o sacrificio de 2.500 vacas
Balseiros: "Tomaremos as medidas necesarias para evitar que veña algún animal infectado"
Feiras, concursos, poxas e calquera evento que supoña unha reunión de gando bovino está prohibido en Galicia, polo menos durante os próximos 21 días.
"Encarecidamente pedimos a transportistas, matadoiros e industrias cárnicas que extremen as medidas e que esixan as certificacións de curmprimento da deseinsectación", solicitou José Balseiros, o director xeral de Gandería.
A recomendación é limitar durante un mes e medio os movementos de animais. Se veñen de fóra, directamente aos matadoiros ou, do contrario, deben pasar unha corentena de vinte e un días con vixilancia veterinaria diaria.
"Non se prohibe a entrada de animais, pero si se prohibe a entrada nas granxas, porque terían que estar inmobilizados durante vinte e un días. Nós pensamos que aínda había que ser máis contundentes", apuntou Ana Rodríguez Vázquez, do Sindicato Labrego Galego.
"Este primeiro paso, antes de que cheguen as temperaturas baixas que impiden o movemento do mosquito, parécenos imprescindible. Hai que tomar medidas de restrición dos movementos porque é a forma de transmisión", declarou Javier Iglesias, de Unións Agrarias.
"Unha medida que facía falta e vén a tempo. E estamos moi preocupados pola afectación desta enfermidade, que se chega a Galicia será a ruína do sector leiteiro e cárnico", advertiu Francisco Bello, o presidente de Asociación Agraria de Galicia.
Hoxe, todo o sector facía desde esta reunión en San Caetano un chamamento a ser estritos no cumprimento.
"E da man da Administración facer o que nos indican para tratar de que isto quede só nunha alerta", dixo Santiago Rego, o presidente dos gandeiros de Tenreira Suprema
Piden tranquilidade aos consumidores porque é unha doenza do gando.
"Non é unha zoonose, polo que non se transmite aos humanos nin consumindo produtos cárnicos ou lácteos", declarou José Balseiro, o director xeral de Gandería
Pero se aparecese un positivo, esixe o baleirado da explotación e o sacrificio de todos os animais.
