Dous incendios en menos de media hora alertan os veciños de Moaña
Un deles foi nunha furgoneta aparcada na Xunqueira, en que había varias bombonas
O outro incendio foi na carpa dos festexos do Concello, no paseo marítimo
A Garda Civil e a Policía Local de Moaña están a investigar dous incendios que se produciron esta fin de semana, de madrugada, con apenas media hora de diferenza.
Un deles foi nunha furgoneta que quedou completamente calcinada. Pouco antes das 5 da mañá, na madrugada do sábado, comezou a arder por causas que se descoñecen. O resplandor das lapas e o ruído alertaron os veciños que estaban durmindo.
O vehículo estaba aparcado na Xunqueira, xusto diante das vivendas dos mestres de Reibón. O perigo, había bombonas no seu interior e a só uns metros estaba aparcado un camión de carburantes.
A furgoneta, din os veciños, levaba máis dun mes aparcada no mesmo sitio. Cren que saíu do taller, que está nesa mesma rúa, e os propietarios decidiron xa non movela, e que mesmo pensaban en despezala.
Sospeitan que puido ser intencionado. Case ao mesmo tempo, en menos de media hora houbo outro incendio. Foi na carpa que o Concello ten instalada para os festexos no paseo marítimo, á altura da praza de abastos.
A Policía Local de Moaña investiga o acontecido na carpa e a Garda Civil o incendio na furgoneta. Tentan determinar se foron intencionados e se os dous incendios están relacionados.
