En Mataró achican a auga e reparan os danos ocasionados pola chuvia
Un home que quedou atrapado no interior do seu coche permanece en estado crítico
Dous barcos afundíronse no porto
Fregonas en man, as familias limpan o ximnasio e a parte baixa deste colexio que quedou anegado tras a tromba de auga que caeu o venres en Mataró. Apuran no traballo para poder abrir o centro o luns. No concello barcelonés hai catro escolas afectadas, Eduardo Marqués, director dunha delas móstrase indignado.
Os desaugadoiros que funcionaban non puideron evacuar esta auga e coouse por todas partes... Hai un factor imprevisible pero evidemente que hai unha falta de mantemento dos equipamentos municipais moi importante.
A localidade vai volvendo á normalidade tras a tormenta que deixou 90 litros de auga por metro cadrado e momentos de angustia. Neste paso subterráneo, da estrada N-II próximo á praia, un home quedaba atrapado no coche. En cuestión de segundos o vehículo desaparece. O condutor, de 63 anos, permanece ingresado en estado crítico.
A borrasca deixou consecuencias tamén no porto de Mataró. Afundíronse dous barcos e outros doce sufriron estragos. Activáronse barreiras de contención por se houbera algunha fuga de combustible.
No tempo que durou a chuvia intensa, os servizos de emerxencias atenderon unhas 240 chamadas do litoral catalán. Baixos asolagados, estradas cortadas e mesmo o servizo ferroviario afectado de forma temporal completan o parte de incidencias.
