Polo menos sete detidos nunha ampla operación antidroga en varios puntos de Galicia
O dispositivo actou desde A Coruña ata a comarca pontevedresa do Salnés
Os axentes realizaron tres detencións en Pontevedra, dúas na Coruña, unha en Ferrol e outra en Arteixo
Arquivo/Policía Nacional
A Garda Civil, a Policía Nacional e Vixilancia Aduaneira despregaron este martes un amplo operativo antidroga en diferentes puntos de Galicia, desde A Coruña ata a comarca pontevedresa do Salnés, que suma sete detidos.
Fontes policiais detallaron que se procedeu á detención de dúas persoas na Coruña, unha en Ferrol, unha no municipio coruñés de Arteixo e tres en Pontevedra.
A operación policial contra o tráfico de drogas e crime organizado atópase baixo segredo de sumario. A maxistrada da praza 3 da Sección de Instrución do Tribunal de Instancia da Coruña dirixe a investigación.
Durante a xornada deste martes houbo entradas e rexistros simultáneos en domicilios e locais da provincia da Coruña e de Pontevedra, segundo informou o Tribunal Superior de Xustiza de Galicia (TSXG).
En Arteixo interviñéronse dous vehículos, marcados por cans para a detección de drogas, para que sexan inspeccionados pola científica.
Un dos detidos xa quedou en liberdade en sede policial.
