Elisa Mouliaá decide finalmente seguir adiante na causa contra Iñigo Errejón
A actriz considera que o expolítico non pode quedar "impune"
Toma esta decisión porque a Fiscalía mantén que procede a absolución para o acusado
Elisa Mouliaá e Íñigo Errejón (Europa Press)
Elisa Mouliaá cambiou de parecer e decidiu seguir adiante coa acusación contra o exportavoz de Sumar Íñigo Errejón. A actriz e presentadora decidira retirala o pasado mércores pero este luns o seu avogado explicou que finalmente continuará coa acusación "a vista da actuación da Fiscalía", xa que o Ministerio Público sostiña que non había delito e que, por tanto, "procede a libre absolución do acusado".
Mouliaá considera que o acusado "non pode quedar impune" das supostas agresións sexuais que cometeu en outubro de 2021 e que ela denunciou en outubro de 2024. Para a actriz esta actitude non é permisible tanto para o seu caso como para o de outras mulleres, e por iso non validará finalmente o escrito que enviou ao Decanato o pasado mércores renunciando á súa acusación contra Errejón.
A Fiscalía pide a absolución
A Fiscalía segue mantendo que non ve delito de agresión sexual na conduta de Íñigo Errejón e pediu a libre absolución do exdirixente político no seu escrito de conclusións finais, no que relata un "encontro sexual" que cesa cando a actriz manifesta que non quere continuar.
O Ministerio Fiscal considera que naquela noite de outubro de 2021, tras coñecerse en persoa houbo entre Errejón e Mouliaá un "flirteo no curso do cal o político bicou a actriz nun ascensor "sen que esta manifestase oposición ao mesmo". Despois, nun piso duns amigos da actriz no que se celebraba unha festa, "beberon, bailaron e charlaron" cos asistentes ata que nun momento da noite para ter máis intimidade decidiron meterse nunha habitación. Alí, segundo o Ministerio Público, Errejón "de forma impetuosa" comezou a bicar a actriz, a quitarlle o suxeitador e tocarlle os peitos, nun acto que "se alongou durante uns minutos", ata que Mouliaá pediu saír do cuarto e o político accedeu á petición.
Tras despedirse dos amigos da actriz, ambos decidiron ir ao piso de Errejón e alí, de novo, este comezou a tocar a actriz, "instante" en que Mouliaá, a quen "non lle estaba agradando o encontro sexual pola présa e vehemencia", lle dixo ao político que non quería continuar "cesando o encontro nese instante e marchando esta a o seu domicilio", relata a Fiscalía.
A Audiencia delibera sobre o procesamento de Errejón
A marcha atrás de Mouliaá, que non se retira do caso, coñécese este luns cando a Audiencia Provincial de Madrid delibera sobre o recurso de Errejón contra o seu procesamento. Os maxistrados decidirán se emendan a resolución do xuíz instrutor Adolfo Carretero de procesarlle tras un recurso no que a súa defensa alegou que non hai indicios de delito, senón un relato "inventado" da denunciante co obxectivo de "obter unha notoriedade e ingresos dos que carecía".
O expolítico, citado este martes
Iñido Errejón está citado este martes para que o xuíz lle notifique a apertura de xuízo oral por presuntas agresións sexuais que decretou o pasado 7 de xaneiro. O escrito presentado por Mouliaá a semana pasada non produce efecto ningún porque non levaba a sinatura do avogado ou o procurador.
O proceso seguirá, polo tanto, o seu curso con ela como acusación particular e a Asociación de Defensa Integral de Vítimas Especializada (ADIVE) como acusación popular. Mouliaá pide tres anos de prisión para Errejón e 30.000 euros de indemnización.
