Xa pasan de quince as denuncias polas fotos de espidos por IA, a metade das afectadas

Xa son máis de 15 as denuncias presentadas en Silleda por mulleres que foron vítimas da difusión de fotos súas espidas creadas con intelixencia artificial.

A investigación segue aberta e a Garda Civil non descarta a aparición de máis vítimas. O equipo de delitos telemáticos da comandancia de Pontevedra dirixe as pescudas.

Por agora, non se puido determinar o autor ou autores destas imaxes que ata o momento afectaron mulleres que son maiores de idade.

As fotografías, segundo as primeiras análises, serían alteradas mediante o método coñecido como deepfake. É a peor cara da chamada IA, a intelixencia artificial. 

"A través da miña parella que llo mandou unha compañeira de traballo, vin o video no que saio espida. Quedei en shock", confesa unha das vítimas. 

Un shock para as vítimas, demasiado sinxelo de manexar. 

"A facilidade é que podemos practicamente dialogar coa intelixencia artificial. Podémoslle dicir o que queremos coas nosas palabras e vaino entender. Polo tanto, é moi fácil de manexar", advirte Fernando Suárez, presidente do Colexio Profesional de Enxeñeiros Informáticos.

Tan intelixente é que mete medo o pouco control que temos sobre as nosas vidas. 

"As 'deepfakes' son un grande risco porque teñen un grande impacto nas persoas, na privacidade e na dignidade das persoas pero os riscos da intelixencia artificial son moitos, por exemplo, crear noticias falsas para manipular a colectivos", advirte Suárez.

"Temos que pensar que calquera imaxe publicada en redes sociais escapa fóra do noso control. Subimos esa imaxe a unha rede social e calquera pode facer unha captura de pantalla e difundila", concorda Diego López, sarxento xefe do EDITE.

Pasou no caso de Silleda, con fotos cotiás dunhas 30 mulleres, elixidas ao azar.

"Na miña foto que é normal, subida a redes sociais, nesta estou cunha camiseta e nesa estou espida", sinala a vítima coas fotos diante.

"Antes había que ter coñecementos de imaxe e aplicacións que non eran de fácil uso pero agora é moi fácil e permite que calquera poida modificar unha imaxe e modificala con calquera contido", explica o presidente do Colexio Profesional de Enxeñeiros Informáticos.

O suposto responsable, un veciño tamén de Silleda, onde se publicou o vídeo con todas as fotos, asegura que lle roubaron o móbil. Fronte a este risco.

"Revisar as opcións de privacidade e reducilas ao círculo máis próximo e pórlle un código de bloqueo ao teléfono móbil", recomenda o xefe do EDITE.

O equipo especializado en delitos tecnolóxicos da Garda Civil de Pontevedra segue a pegada dos móbiles e das fotos. O testemuño das vítimas e tamén das plataformas dixitais na cesión de datos resultará clave. O domingo chegou a primeira denuncia. En catro días, suman unhas 16, pero os que viron o vídeo contaron polo menos unhas trinta afectadas.