Elévase a 41 o número de mortos no accidente de trens en Adamuz

Elévase a 41 o número de mortos no accidente de trens en Adamuz. Esta última vítima localizouse baixo os restos do tren Iryo, cuxos tres últimos vagóns descarrilaron e ocasionaron o sinistro ao chocar coa cabeceira do tren Alvia, segundo confirmou así mesmo a Xunta de Andalucía.

O ministro do Interior Fernando Grande-Marlaska asegurou que están localizados tres corpos entre os amasillos do tren Alvia, que se espera que nas próximas horas sexan excarcerados.

Durante toda a noite mantivéronse as tarefas dos equipos técnicos e de rescate desprazados ao accidente ferroviario, centrados na instalación dun gran guindastre para levantar os vagóns do Alvia sinistrado.

Continúan ademais 39 feridos ingresados en hospitais, dos que 13, un deles menor de idade, están na Unidade de Coidados Intensivos.

A Garda Civil confía en ter pronto o resultado da identificación das vítimas

Os laboratorios centrais do Servizo de Criminalística da Garda Civil, situados en Madrid, están xa analizando as mostras de ADN recollidas nos cadáveres do accidente de trens ocorrido en Adamuz este domingo para proceder ao seu cotexo e identificar as vítimas, cuxos resultados espera ter pronto.

O comandante Serrano é o xefe do Departamento de Bioloxía do Servizo de Criminalística e chegou hai unhas horas do lugar do accidente, que causou polo menos 41 mortos, para recibir nos laboratorios as mostras. Confía en ter canto antes os resultados. Desde o laboratorio do departamento de Bioloxía, o comandante explicou EFE que os seus compañeiros de Criminalística (uns 30 axentes) atópanse en Córdoba realizando labores de identificación, como a recollida de pegadas e de mostras de ADN.

Cos perfís xenéticos dos familiares que doaron mostras e os recollidos nos cadáveres ou restos cadavéricos que van aparecendo no lugar do accidente, o laboratorio realiza o cotexo e cando salta a coincidencia, comunícase ao Centro de Integración de datos. Esa identificación comunícase ao xuíz, que é quen autoriza que se informe aos familiares.

Serrano indica que a identificación dos cadáveres que resultaron amputados é algo máis complexa, porque hai que recoller mostras de ADN de todas as partes achadas e proceder aos cotexos para chegar á "reconciliación" do corpo.

As primeiras mostras chegaron onte á noite desde Córdoba en helicóptero. Trátase das que se extraeron xa de todos os cadáveres aos que se lles practicou a autopsia. Esta mesma mañá estaba previsto que chegasen máis desde Málaga e Huelva e outras noutro helicóptero desde Córdoba.

Esta mesma noite ou mañá chegarán as dos cadáveres aos que hoxe se está practicando a autopsia. O Departamento de Bioloxía está xa traballando para obter os resultados canto antes "sen solución de continuidade", salientou o comandante. 

Boa resposta dos familiares

Para poder cotexar as mostras é fundamental a participación dos familiares das vítimas. Por iso, a Garda Civil habilitou cinco puntos en Madrid, Córdoba, Huelva, Málaga e Sevilla para a recepción desas mostras.

Di Serrano que é moi importante que calquera persoa que bote de menos a un familiar, denuncie a desaparición, e lembra que non é só a mostra de ADN a que pode axudar á identificación, senón moitos máis datos da súa fisonomía etc..., porque tamén pode contribuír a identificar persoas que non faleceron, pero poden atoparse desorientadas ou en calquera outra situación.

"Pódense pedir radiografías dentarias para identificar dentalmente, detalles de tatuaxes, cicatrices, altura.... Moitos datos que poden chegar a orientar a esa identificación", engadiu.