Dupond-Moretti, ministro francés de Xustiza, sentará no banco dos acusados

O ministro francés de Xustiza, Éric Dupond-Moretti, sentará no banco dos acusados dun tribunal especial, acusado de aproveitar o seu posto para vingarse de maxistrados cos que mantivo diferenzas durante a etapa en que era avogado, segundo anunciaron este luns os seus letrados.

É a primeira vez que un ministro de Xustiza é enviado ante este tribunal mentres está no cargo, aínda que os seus avogados apresuráronse a asegurar que recorrerán a decisión ante o Tribunal Supremo.

Dupond-Moretti, que antes de que o presidente Emmanuel Macron o nomease ministro en 2020 era un dos avogados máis coñecidos de Francia, estaba procesado desde xullo de 2021 e agora terá que responder ante o Tribunal de Xustiza da República, unha corte especial para os membros do Goberno no exercicio das súas funcións.

Sobre Dupond pesa a sospeita de aproveitar o seu posto de ministro para tomar decisións contra maxistrados con quen tivera diferenzas cando era letrado. Dous casos, en concreto, levantan as principais sospeitas dos investigadores.

O primeiro, a apertura dunha investigación administrativa contra tres maxistrados da Fiscalía Nacional Financeira que incluíron a Dupont-Moretti nunha investigación que afectaba o expresidente Nicolas Sarkozy por tráfico de influencias.

En concreto, eses maxistrados ordenaron revisar o rexistro de chamadas de varios avogados, entre eles Dupond-Moretti. O segundo caso refírese a unha investigación aberta contra o multimillonario ruso Dimitr Rybolovlev, propietario do club de fútbol Mónaco.

O ministro lanzou unha denuncia administrativa contra o xuíz instrutor da causa na que el era avogado dun dos procesados. O envío de Dupond-Moretti ante os xuíces debilita a súa posición dentro do Goberno, sobre todo nun momento en que o ministro afronta unha reforma da Xustiza para o que recibirá un importante incremento de fondos nos orzamentos dos próximos anos.