Dúas persoas, que simulaban ser persoal de estradas, detidas por roubo de cableado público no Pereiro de Aguiar
Dúas persoas, que simulaban ser persoal de estradas, detidas por roubo de cableado público no Pereiro de Aguiar
Decretan o ingreso en prisión sen fianza para un dos arrestados
O valor do cable de cobre subtraído ascende a máis de 20.000 euros
Non levantaban sospeitas porque ían coa mesma vestimenta que os traballadores de mantemento de estradas
Un dos detidos. Garda Civil.
O Equipo Roca da Garda Civil de Ourense, no marco da operación Mixmo detivo unha muller de 46 anos e un home de 37, veciños de Ourense, como presuntos autores de tres delitos de furto de cable de cobre da iluminación pública no Pereiro de Aguiar.
A operación iniciouse en xullo de 2026, tras ter coñecemento do furto de cable.
Segundo informou a Garda Civil, os feitos aconteceron o 14 de xullo pasado na estrada OU-536, onde os arrestados levantaron supostamente 12 arquetas para subtraer cables da iluminación pública. Tamén o 4 de setembro, no mesmo punto e cando o cable xa fora reposto, levaron 168 metros.
Ademais, o 10 de setembro, no lugar da Medorra, tamén no Pereiro de Aguiar e co mesmo modus operandi, apoderáronse de 696 metros de cable.
Os arrestados facíanse pasar por persoal de mantemento de estradas
En total o valor do cable subtraído ascende a 20.535 euros. No que respecta ao modus operandi, os autores utilizaban a mesma vestimenta que o persoal de mantemento de estradas. Con esta caracterización non levantaban sospeitas entre o resto de usuarios das vías.
Durante a mañá do día 28 de setembro, a Garda Civil estableceu un dispositivo de vixilancia nas inmediacións dun establecemento de compra-venda de chatarra situado no Polígono de San Cibrao das Viñas, e sorprendeu ao home intentando vender material idéntico ao subtraído.
Os detidos pasaron a disposición do Tribunal de Instancia (Sección de Instrución) Praza 3 de Ourense, que decretou o ingreso en prisión sen fianza do home detido. A operación continúa aberta.
