Dispárase a demanda de gasóleo de calefacción

"Non é normal que nesta época entren tantos pedidos de gasóleo C, para calefacción, non é nada normal", apunta Marcos Moreira, xerente de Combustibles Otero.

Levan toda a semana traballando arrreo e nin con esas dan abasto para servir a todos os clientes que estes últimos días queren encher os depósitos da calefacción. E é que dende que comezou o conflito en Oriente a escalada de prezos se deixou sentir tamén no gasóleo C. Encher un depósito de 1.000 litros custa 400 euros máis que hai 7 días.

  "O venres estábase vendendo o gasóleo de calefacción a 89 céntimos o litro e hoxe estase vendendo a 1,30 céntimos o litro", explica.

Hai traballo fóra, na repartición, pero tamén dentro das oficinas, onde os teléfonos botan fume.

 "Hai momentos que temos que parar de coller o teléfono para poder organizar".

 "O prezo está a un con trinta e a entrega de momento estamos collendo pedidos para luns, martes. Teriamos que dar o prezo un día antes da subministración", informa un comercial da gasolineira a un cliente.

O prezo sobe dun día para outro e ata os distribuidores teñen problemas de conseguir gasóleo nos mercados grosistas

"Cada día está subindo o prezo de compra e non hai todo o produto que un quixera ter. Pode chegar unha hora, ás 11 da mañá, 11:30 da mañá e dicirnos xa non se vende máis, cortamos vendas", explica Marcos.

Este pico de demanda ás portas da primavera pon de manifesto o medo que hai a que o conflito se prolongue durante meses e a escalada de prezos continúe.