Dinamarca asegura que o acordo sobre Groenlandia non cuestiona a súa soberanía
"Só Dinamarca e Groenlandia poden tomar decisións en cuestións que concirnen a Dinamarca e Groenlandia", recalca a primeira ministra danesa
Mette Frederiksen recoñece que a seguridade no Ártico é un asunto de toda a OTAN e ve natural que o asunto sexa discutido cos EUA
A primeira ministra danesa, Mette Frederiksen, nunha conferencia de prensa tras reunirse co primeiro ministro de Groenlandia o pasado 13 de xaneiro (Liselotte Sabroe/Ritzau Scanpix/REUTERS)
A primeira ministra danesa, Mette Frederiksen, sinalou este xoves que o acordo sobre Groenlandia no que os Estados Unidos traballa coa OTAN non discute a soberanía de Dinamarca sobre ese territorio autónomo, segundo lle informou o secretario xeral da OTAN Mark Rutte.
"A OTAN coñece absolutamente a posición do Reino de Dinamarca. Podemos negociar sobre todo o político: seguridade, investimentos, economía. Pero non podemos negociar sobre a nosa soberanía. Informáronme de que tampouco foi o caso. Por suposto, só Dinamarca e Groenlandia poden tomar decisións en cuestións que concirnen a Dinamarca e Groenlandia", declarou Frederiksen nun comunicado.
Frederiksen destacou que o Goberno danés coordinou a súa actuación co de Groenlandia durante todo o proceso e mantivo un estreito diálogo coa OTAN, e que ela mesma falou con Rutte tanto antes como despois da súa reunión co presidente Donald Trump en Davos.
"A seguridade no Ártico é un asunto de toda a OTAN. Por iso é bo e natural que tamén sexa discutida entre o secretario xeral da Alianza e o presidente dos Estados Unidos. O Reino de Dinamarca traballou durante moito tempo por que a OTAN aumente o seu compromiso no Ártico", apunta o comunicado.
Dinamarca quere seguir mantendo un diálogo construtivo cos seus aliados sobre como reforzar a seguridade no Ártico, incluído o sistema de defensa antimísiles Golden Dome, "partindo de que transcorra con respecto pola nosa integridade territorial", engadiu a primeira ministra danesa.
Trump confía en que o acordo estea pronto sobre o papel
O xefe da Casa Branca Donald Trump anunciou a véspera no Foro Económico Mundial en Davos (Suíza) un acordo coa OTAN sobre a illa ártica realmente fantástico: "Temos todo o que queriamos".
En declaracións aos xornalistas antes de abandonar o Centro de Congresos de Davos, o mandatario asegurou que se trata dun acordo para a seguridade nacional e internacional e a longo prazo.
Segundo o mandatario estadounidense, o texto deste acordo será feito público pronto, debido a que está nunha fase avanzada e se está traballando nos detalles.
Frederiksen ten previsto viaxar este xoves a Londres para reunirse co seu colega británico Keir Starmer e desprazarase logo a Bruxelas para participar no cumio extraordinario de líderes da Unión Europea sobre a cuestión de Groenlandia e os Estados Unidos.
Estes son os catro puntos que se coñecen actualmente do preacordo:
1.- No primeiro punto do texto figura de forma xenérica que "se retira a ameaza de impoñer novos aranceis".
Trump xa adiantou onte á noite que desistirá de impoñer novos aranceis aos oito países europeos que enviaron soldados a Groenlandia a partir do 1 de febreiro para participar en manobras militares lideradas por Dinamarca.
Á súa vez, os líderes da Unión Europea tiñan previsto debater hoxe nun cumio extraordinario distintas posibilidades para responder a esa ameaza comercial, incluída a máis contundente, o chamado instrumento anticoerción e a introdución de aranceis por valor duns 93.000 millóns de euros a importacións estadounidenses.
2.- Renegociarase un acordo sobre o estacionamento de tropas en Groenlandia que data de 1951, que foi emendado xa unha vez en 2004 e que se titula "Defensa: Groenlandia". Nese documento no seu artigo 1 consta que a base aérea de Thule ou Pituffik no norte da illa ártica "é a única zona de defensa en Groenlandia".
O obxectivo é emendalo de novo para incluír unha cláusula sobre a Cúpula Dourada, o escudo antimísiles que Trump quere establecer e que custará uns 175.000 millóns de dólares. Trump quere que o escudo, inspirado no de Israel, estea operativo ata finais do seu mandato actual en 2029 e que protexa -principalmente dunha eventual ameaza da China e Rusia- non só os EUA, senón tamén O Canadá.
3.- O Goberno dos EUA poderá intervir no control de investimentos en Groenlandia. Deste xeito, podería impedir que países competidores como A China ou Rusia aseguren recursos na illa. Trump xa adiantou a véspera na cadea CNBC que o preacordo incluirá dereitos sobre minerais de terras raras na illa.
4.- Os Estados europeos da OTAN comprométense máis firmemente coa seguridade na rexión ártica. Trátase dunha esixencia de Trump, que utilizou a suposta presenza de barcos e submarinos chineses e rusos ao redor de Groenlandia como argumento para afirmar que se quería facer coa illa (con título de propiedade) por motivos de seguridade nacional e que só os EUA era capaz de garantir a seguridade desa "masa de xeo" para protexer ao seu país e o mundo.
No preacordo non está incluído, que se saiba, ningunha mención sobre a soberanía da illa e a súa integridade territorial, que Dinamarca e Groenlandia sempre se negaron a entregar a Trump.
