Difícil proceso de identificación das vítimas do incendio de Crans Montana, en Suíza

Especialistas da policía seguen traballando no interior e nos arredores do bar A Constelación, onde esta fin de ano morreron polo menos 40 persoas, a maior parte delas mozos moi novos. Tratan de entender o porqué dun incendio que en cuestión de minutos atrapou centos dos asistentes á festa.

Os dous donos do local, situado na famosa estación de esquí suíza de Crans Montana, xa declararon diante da policía e da fiscal que leva o caso, pero saíron sen cargos polo momento e coa única obriga de estar localizables.

O lume, ao parecer, produciuse polo contacto das bengalas coa espuma do teito.  Polo momento hai 40 mortos confirmados, a maior parte deles de nacionalidade suíza, francesa e italiana. O estado de moitos dos cadáveres fai imposible a identificación inmediata, polo que hai que recorrer ás análises de ADN, que atrasan un proceso que está resultando moi duro para os pais e familiares que agardan noticias dos seus.

Esta é a última foto que teño do meu fillo, dúas horas antes de que marchase para o bar. Se o viron nos hospitais, ou no depósito, xa sexa vivo ou morto, por favor... díganmo. Non sei a gravidade das súas queimaduras, non sei se é recoñecible, non o sei. O único que quero é atopar o meu fillo, quero atopar o meu fillo, di Laetitia Brodard-Sitre, nai dun mozo desaparecido.

Tamén lenta é a identificación de moitos dos 119 feridos que permanecen nos hospitais, xa que moitos deles están inconscientes e vendados.

Nas proximidades do bar queimado, a xente deposita candeas en homenaxe ás vítimas da traxedia, mentres a estación de esquí de Crans Montana reabriu este venres as súas portas.