Instalada na Casa de Galicia en Madrid a capela ardente do xornalista Fernando Ónega
A raíña lembra a Fernando Ónega como un xornalista "ao que todos nos queriamos parecer"
A capela ardente permanecerá aberta ata as nove da noite
O xornalista de Pol, cronista clave na Transición, morreu aos 78 anos
Sonsoles Ónega chega á capela ardente situada na Casa de Galicia de Madrid (José Oliva/Europa Press)
A capela ardente do xornalista e cronista político Fernando Ónega, instalada na Casa de Galicia de Madrid, abriu ás 10:00 da mañá e familiares e amigos íntimos foron os primeiros en chegar.
A súa muller, Ángela, e as súas fillas, Cristina e Sonsoles Ónega, acudiron á primeira hora para recibir o féretro do xornalista, falecido este martes aos 78 anos, e ante o que se están colocando decenas de coroas e ramos de flores.
Alberto Aza, ex-xefe da Casa do Rei e do gabinete do expresidente do Goberno Adolfo Suárez foi unha das primeiras personalidades que acudiron ao velorio, ao que tamén chegou o expresidente do Executivo, Mariano Rajoy.
"Foi un profesor, un mestre do xornalismo, un personaxe irrepetible", sinalou Aza á entrada da capela, pola que tamén están a pasar decenas de amigos xornalistas.
A raíña lembra a Fernando Ónega como un xornalista "ao que todos nos queriamos parecer"
A raíña Letizia acudiu á capela ardente do xornalista Fernando Ónega, "un profesional ao que todos nos queriamos parecer" cando estudabamos xornalismo nos anos 90, sinalou ao chegar á Casa de Galicia de Madrid onde se instalou o velorio.
"Veño dar un abrazo e recoñecer unha profesión; o xornalismo, un medio; a radio e un profesional artesán que é Fernando Ónega", dixo antes de entrar na capela ardente e dar o pésame á familia, entre a que se atopa a súa amiga Sonsoles, a filla do xornalista falecido onte aos 78 anos.
Letizia lembrou emocionada como todos os estudantes da facultade de Ciencias da Información de Madrid nos anos 90 "tiñamos a Fernando Ónega como un home inalcanzable, como un profesional ao que todos nos queriamos parecer" e recalcou que "me acompañou toda a vida" a través da radio.
"E logo tiven a sorte de que coñecín unha das súas fillas nos traballos en que fun redactora, así que Fernando pasou de ser un referente ao pai da miña amiga", sinalou.
No interior da capela ardente, que permanecerá aberta ata as 21 horas, un grupo de gaiteiros homenaxearon o xornalista lucense, nacido en Mosteiro (Pol).
