Detido un home de 46 anos que retransmitía en directo as agresións sexuais á súa filla menor

A Policía Nacional detivo en Madrid un home de 46 anos por difundir a través dunha aplicación de retransmisión en directo as agresións sexuais que el mesmo cometía contra a súa filla de sete anos a cambio de moedas virtuais coas que o arrestado aumentaba a súa popularidade e adquiría produtos que se ofertaban nesa canle.

Grazas ao aviso que un cidadán deu en novembro no correo electrónico habilitado pola Policía Nacional para denunciar delitos de pornografía infantil, os axentes localizaron e detiveron un mes despois este agresor sexual que xa se atopa en prisión, informa este venres a Dirección Xeral da Policía.

Os investigadores da Unidade Central de Ciberdelincuencia especialistas na sección de protección ao menor constataron que o detido utilizaba salas privadas de aplicacións de retransmisións en directo para captar usuarios interesados mostrando fotos coa súa filla nunha cama.

Posteriormente noutra aplicación difundía en directo as agresións que el mesmo cometía contra a nena. A contraprestación que o arrestado obtiña pola conexión destes pedófilos consistía en obter moedas virtuais para cambiar na propia web por agasallos ou mellora de posición. A Policía sospeita que non chegou a trocar nin 1.000 euros.

Os investigadores aseguran que este tipo de modalidade de agresións sexuais retransmitidas en directo é pouco común en España, aínda que a aplicación usada, da que preferiron non detallar o seu nome, é legal e pouco coñecida.

A Policía resalta que este tipo de plataformas, unha vez coñecen que se comete un feito delituoso, fan esforzos para evitar estes comportamentos e previlos.

Avanzadas as pescudas, os axentes lograron identificar este home, que residía na capital. Foi detido en decembro, e no rexistro realizado no seu domicilio interviñéronse dous teléfonos móbiles en que se atopou gran cantidade de material pornográfico.

Unha vez pasou á disposición da autoridade xudicial como presunto responsable dun delito de corrupción de menores consistente na produción, posesión e distribución de pornografía infantil e agresión sexual, decretouse o seu inmediato ingreso en prisión.

Responsables policiais da Unidade de Ciberdelincuencia ofrecen este venres detalles sobre esta investigación bautizada como operación Esquil. A Policía Nacional lembra que dispón do correo electrónico www.denuncias.pornografía.infantil@policia.es co obxectivo de involucrar a cidadanía na loita contra os delitos relacionados coa pornografía infantil de forma anónima e confidencial.

Nos últimos dous anos esta canle recibiu máis de 5.000 mensaxes que foron analizadas por especialistas. En moitos casos orixinaron operacións policiais de éxito.