Detido un adestrador de karate por agredir sexualmente os seus alumnos en Málaga

A Policía Nacional detivo un home de 70 anos en Málaga por presuntamente agredir sexualmente varios dos seus alumnos. O home era instrutor de karate e podería levar cometendo este tipo de delitos dende o 2010.

Os axentes atribúenlle catro delitos de agresión sexual continuada, pero non se descarta que se atopen máis vítimas. O detido ingresou en prisión por orde da autoridade xudicial.

O Grupo de Menores (Grume) da Comisaría Provincial de Málaga fixo unha investigación por mor dos datos achegados por unha asociación que presta axuda e asistencia a vítimas de agresións sexuais producidas durante a infancia.

Segundo os prexudicados, o agresor valíase da súa posición de adestrador para cometer os delitos. Por agora son catro os mozos que manifestaron sufrir estas agresións cando eran menores de idade.

Todos sinalan que o investigado aproveitaba as concentracións de cada competición para compartir habitación de hotel cos seus alumnos, onde cometía as agresións.

Así, tamén manifestaron que se repetían nas instalacións deportivas onde adestraban. O instrutor manipulaba as vítimas emocional e psicoloxicamente e dáballes agasallos e atencións para que non contasen os feitos.

No rexistro do domicilio os axentes comisaron dez teléfonos móbiles, un computador de mesa, unha tableta e tres memorias USB, que foron remitidos ao Grupo de Informática Forense da Brigada Provincial de Policía Científica de Málaga para o seu baleirado.

Segundo as xestións practicadas, os feitos poderían producirse desde hai décadas. A investigación segue aberta e non se descarta a localización de máis afectados.