Detido Francisco de Borbón por branqueo de capitais vinculados ao narcotráfico
O primo do rei está investigado polo branqueo de beneficios a través dunha empresa de criptomoedas
A causa parte da detención do exxefe da UDEF que tiña máis de 20 millóns de euros ocultos nas paredes da casa
Francisco de Borbón nunha imaxe de arquivo. Europa Press/José Oliva
A Policía Nacional detivo en Málaga a Francisco de Borbón, primo do rei Felipe VI, por un presunto delito de branqueo de capitais vinculado á rede de narcotráfico na que xa fora arrestado en novembro de 2024 o exxefe da UDEF en Madrid.
Xunto a el foron detidas outras tres persoas, entre elas unha muller e un avogado, todas presuntamente relacionadas coa mesma organización criminal.
Segundo a investigación, Francisco de Borbón estaría implicado no branqueo dos beneficios da rede de narcotraficantes a través dunha empresa de criptomoedas.
Está previsto que este mércores pase a disposición xudicial ante o maxistrado da Audiencia Nacional Francisco de Jorge, que dirixe as dilixencias desde que se activou a operación policial contra unha organización que introducía cocaína en España oculta en colectores de froita.
Nesa operación foi detido o exinspector xefe de Delitos Económicos da Brigada de Policía Xudicial da Xefatura Superior de Madrid, Óscar S. G., ao que os investigadores atribúen a cobertura da entrada da droga a cambio de cantidades próximas ao millón de euros por cada operación.
Nos rexistros realizados pola unidade de Asuntos Internos, a policía atopou máis de 20 millóns de euros emparedados na súa vivenda de Alcalá de Henares e preto doutro millón oculto no seu despacho da Xefatura Superior de Policía de Madrid.
Na mesma causa foron detidas inicialmente máis dunha ducia de persoas, ás que se sumaron novos arrestos nos meses seguintes.
En maio, a Audiencia Nacional confirmou a prisión provisional para o exxefe da UDEF polo risco evidente de fuga, tendo en conta a súa presunta integración nunha organización delituosa e o volume de diñeiro que manexaba.
O maxistrado ordenou tamén a posta en liberdade doutros investigados tras decisións da Sala, que apreciou deficiencias na información facilitada cando se decretaron algunhas prisións preventivas baixo segredo de sumario.
