Detido en Vigo tras entrar no hospital Povisa cun coitelo
O arrestado tivo no exterior do recinto unha discusión con outra persoa
Dentro do hospital non amezou nin os pacientes nin os sanitarios
Axentes da Policía Nacional da Comisaría de Vigo detiveron este luns un individuo que accedeu ao Hospital Povisa cun coitelo e que tivera unha discusión previa con outra persoa no exterior, na que esgrimira a arma.
Segundo informaron fontes policiais, os feitos ocorreron sobre as 15:00 horas, cando se produciu unha discusión entre dúas persoas nunha zona de carga e descarga no exterior do hospital.
Un condutor aparcou indebidamente nese espazo habilitado para o almacén deste centro médico. Un transportista que estaba na zona recriminoulle esta acción e os dous homes entraron nunha disputa verbal. No transcurso da mesma, un dos implicados esgrimiu un coitelo e ameazou o traballador que lle chamara a atención pero a rifa "non foi a maiores".
Con todo, a persoa que portaba ese coitelo accedeu logo ao centro sanitario e, segundo informaron fontes do hospital, algunha testemuña decatouse de que levaba ese obxecto. Con todo, as mesmas fontes aclararon que en ningún momento o home ameazou o persoal ou os pacientes.
Ante o aviso de que o individuo portaba un coitelo, o persoal de seguridade deu a alerta á Policía. Coa axuda do persoal e das cámaras de seguridade localizouno no interior do edificio onde procedeu á súa detención por un presunto delito de ameazas con arma branca. Levaba o coitelo no pantalón.
Segundo informou a Policía Nacional, o transportista supostamente ameazado non quixo presentar denuncia.
