Detidas sete persoas nunha operación antidroga en Ferrolterra
Detidas sete persoas nunha operación antidroga en Ferrolterra
Incautáronse de 7.000 doses de heroína na cidade de Ferrol e de 17.000 euros en metálico
"A organización criminal dispoñía de varios pisos en Ferrol para a distribución de estupefacientes", di a policía
Tamén se dedicaban ao branqueo de cartos procedentes do tráfico de drogas e á coordinación dunha granxa de minería de criptomoedas
A Policía Nacional detén sete persoas na área de Ferrol tras desarticular unha organización criminal con actividade en varias provincias e dedicada ao transporte e distribución de estupefacientes en Galicia.
Na operación incautáronse dunhas 7.000 doses de heroína na cidade de Ferrol, nesta operación denominada Ollomol. A Policía estima que a "organización criminal dispoñía de varios pisos en Ferrol para a distribución de estupefacientes".
Segundo a investigación, os integrantes dedicábanse tanto ao "branqueo de diñeiro procedente do tráfico de drogas" como á coordinación dunha "granxa de minería de criptomoedas".
A Comisaría de Ferrol informou que a operación foi dirixida polo xulgado de instrución número dous da cidade.
Canda a heroína, tamén se recolleron uns 17.000 euros en metálico e tres vehículos, entre outros efectos. Ao mesmo tempo, a Policía Nacional informou de que se realizaron catro rexistros domiciliarios e nun local "onde se atopaba unha granxa de minería de criptomoedas".
"A organización criminal desarticulada, asentada principalmente na provincia da Coruña, en Ferrol e Narón, estaba considerada unha das máis activas tanto no transporte como na distribución de estupefacientes na comarca de Ferrolterra", explicou a policía.
A investigación comezou o pasado mes de xaneiro, despois de detectar a policía "o desprazamento de persoas de Ferrol ás Rías Baixas para negociar o traslado".
Posteriormente, os axentes determinaron "o modus operandi da organización para o transporte" e distribución e a "localización dos inmobles para a custodia da droga antes da súa distribución".
O seu máximo responsable tamén "se dedicaba ao branqueo de diñeiro procedente do tráfico de estupefacientes a través dunha granxa de minería de criptomoedas".