Unha veciña de Tui, detida pola queima de coches
Unha veciña de Tui, detida pola queima de coches
Ao parecer, actuou por unha vinganza familiar
O concello conta con ter retirados os coches esta noite
As rúas da zona vella de Tui aínda conservan as pegadas dunha noite insólita. Esqueletos dunha vintena de coches calcinados e residuos da extinción do lume. A Policía Xudicial e un equipo da Científica analizaron os restos durante todo o día para recabar probas.
As imaxes das cámaras situadas no lugar dos feitos permitiron localizar a presunta responsable: unha muller de 50 anos, residente da zona e que está sendo interrogada en dependencias policiais antes de pasar a disposición xudicial.
O alcalde di que é a única detida e que os motivos aínda se están investigando.
A muller parece que actuou por unha vinganza familiar, que foron as disputas por unha herdanza as que a levaron a prenderlles lume aos coches aparcados dos seus familiares. O resto dos vehículos, ata 21, e os desperfectos ocasionados nos edificios próximos por mor do lume, serían danos colaterais.
A alarma saltou ás 4 da madrugada, cando os servizos de emerxencia comezaron a recibir chamadas porque ardían os coches aparcados na parte histórica da cidade. Comezaba unha noite en vela para ducias de veciños, que se amosan aínda preocupados e consternados polo que presenciaron
Mobilizáronse bombeiros de Valença, Baixo Miño e Ponteareas e Protección Civil de Tui, O Porriño e Mos. A policía local di que é a primeira vez que se queiman tantos coches xuntos.
O Concello conta con ter retirados esta noite todos os vehículos para proceder a limpar e desinfectar a zona pola mañá.
