Deteñen unha persoa por un incendio en Celanova á que se lle imputan outros 20
A persoa arrestada estaba sendo obxectivo de vixilancia, xa que se sospeita que prendeu 7 incendios máis ese ano e outros 13 no pasado
A Unidade de Policía Nacional Adscrita de Galicia (UPA) detivo unha persoa como sospeitosa de provocar un incendio en Celanova, de 0,1 hectáreas o pasado 31 de xullo, á que se lle imputa a autoría doutros 20 na mesma área.
Segundo informou a Xunta, a detención enmárcase nunha investigación levada a cabo pola UPA polos incendios forestais rexistrados nesa zona, onde xa se estaba realizando un seguimento. De feito, a persoa detida levaba meses baixo vixilancia e impútanselle outros 7 incendios este ano e 13 máis en 2024.
No que vai de campaña de loita contra os incendios, a UPA detivo ou investigou un total de 14 persoas como presuntas autoras de incendios forestais.
O incendio de Celanova, que afectou 0,1 hectáreas de superficie rasa, rexistrouse na parroquia de Amoroce de forma intencionada, con tres focos moi próximos entre si, presuntamente pola persoa que foi detida e que no momento da súa detención portaba varios chisqueiros e papel que se cre que estaban destinados a prender lume.
As dilixencias por estes feitos foron remitidas ao Xulgado de Instrución en funcións de garda de Celanova.
A Xunta volve a apelar á prudencia para evitar que se produzan incendios, e lembra que está á disposición da cidadanía o número de teléfono gratuíto 085, para chamar en caso de detectar algún lume, ou o número 900815085, que é anónimo, para denunciar calquera sospeita de actividade delituosa incendiaria.
