Chandrexa de Queixa, Monterrei e Oímbra piden ao Goberno ser declarados zonas catastróficas

O Concello de Chandrexa de Queixa vai solicitar ao Goberno central que declare ao municipio zona catastrófica ou zona afectada gravemente por unha emerxencia de protección civil debido aos incendios forestais.

A decisión foi unánime no Pleno do Concello, logo de que o incendio do municipio queimase máis de 16.000 hectáreas e afectase a once aldeas.

O lume afectou tamén a outros seis municipios e queimou en total 19.000 hectáreas, e aínda segue activo.

No acordo do pleno recóllese que esta é a catástrofe ambiental máis grave do concello na súa historia recente e sinala que as consecuencias económicas son incalculables.

Xa morreron varios animais, colapsou unha vivenda e provocou unha falta de abastecemento para alimentar ao gando, polo que é preciso declarala coma zona catastrófica para obter axudas estatais.

O Concello tamén acordou solicitar á Xunta que as superficies queimadas se consideren admisibles para as liñas da Política Agraria Común (PAC).

Tamén queren que se permita o pastoreo, con autorización expresa, nas zonas queimadas e se dispoñan os medios necesarios para reparar os danos.

Ademais, solicitou á Confederación Hidrográfica Miño-Sil que permita a recollida de auga para poder abastecer os animais das explotacións afectadas polos incendios, exenta de taxas debido á excepcionalidade da situación.

Os concellos de Monterrei e Oímbra tamén solicitan ser declrados zona gravemente afectada por unha emerxencia.