Deteñen un home en Ribadeo que transportaba 10 quilos de cocaína e haxix ocultos no seu vehículo

A Garda Civil detivo un home, de 51 anos e veciño de Vilanova de Arousa, que transportaba cinco quilos de cocaína e outros tantos de haxix nun dobre fondo artesanal no seu vehículo cando circulaba pola A-8, ao seu paso pola localidade lucense de Ribadeo.

Segundo informou o Instituto Armado, os feitos producíronse o día 2 e ante a rapidez da substancia en reaccionar aos reactivos e a disposición da mesma, os axentes sospeitaron da posibilidade de que se tratase de tráfico internacional de estupefacientes. Por iso, rexistraron o domicilio do detido e os investigadores percibiron que a vivenda, a pesar de non ter aveños de valor, estaba permanentemente vixiada por un circuíto de cámaras de fabricación caseira.

Os axentes localizaron na vivenda unha estancia que constituía un taller de adulteración, corte e envasado de substancias estupefacientes. Na habitación atopábase un armario que albergaba grandes cantidades de estupefacientes.

Desta forma, atoparon haxix, cocaína e heroína en diferentes presentacións, preparadas para a súa distribución. En total interviñeron: 4,9 quilogramos de cocaína, 4,2 quilogramos de heroína, 9,9 quilos de haxix en tabletas individuais, substancias de corte, dous teléfonos satelitais e unha máquina de contar diñeiro.