Deteñen tres persoas máis polos altercados previos ao Celta-Olympique de Lión en Vigo

Tres persoas foron detidas pola Policía Nacional en relación cos altercados previos ao partido da liga Europa entre o Celta e o Olympique de Lión en Vigo, que xa deixaran dous arrestos nas horas posteriores a eses sucesos.

O ataque produciuse a noite do 12 de marzo ao redor dun local de hostalería vigués en que se atopaban seareiros do equipo francés e nel víronse implicados unha trintena de membros do grupo ultra Tropas de Breogán, entre os que se atopaban os detidos.

A Policía explica nun comunicado que os ultras, para evitar seren identificados, vestían con roupa escura, capucha e pasamontañas.

Tres afeccionados do equipo francés sufriron feridas inciso-contusas e dous deles tiveron que ser trasladados ao hospital para ser atendidos.

O establecemento presentou danos graves, malia que os seus propietarios tentaron evitar males maiores e procederon a bloquear as portas de acceso.

Foi entón cando os encapuchados comezaron a golpear os cristais e as portas con paus de madeira e barras de metal de obra para tratar de acceder ao seu interior e, nese ataque, lograron escachar os cristais, que bateron nos afeccionados franceses.

Ao non poderen acceder ao interior, os ultras abandonaron a zona correndo, en pequenos grupos e diferentes direccións, para evitar seren localizados polos axentes que se dirixían cara ao lugar dos feitos.

Aos detidos impútanselles delitos de lesións, desordes públicas e danos.

As investigacións continúan abertas, á espera de poder identificar máis autores da agresión, e non se descartan novas detencións.

Esta operación policial foi desenvolvida pola Brigada Local de Información da Comisaría Local de Vigo-Redondela, no marco do Plan Operativo de Prevención da Radicalización Violenta da Policía Nacional.