Deteñen os supostos autores dun roubo de cable de cobre en Triacastela

A Garda Civil de Sarria detivo este pasado mércores os tres presuntos autores dun roubo de cable de cobre ocorrido en Triacastela.

Os feitos ocorreron nun tendido de cable situado ao carón da estrada LU-633, que vai de Sarria a Pedrafita do Cebreiro, onde os presuntos autores levaron a cabo o corte da liña pertencente á rede de telefonía fixa. 

No lugar os axentes localizaron varias provisións de cable de cobre ocultos entre a maleza. Tras a súa recuperación foi trasladado ao cuartel da Garda Civil para poñer todo o material ao dispor dos seus lexítimos propietarios. En total o seu peso era duns 380 quilos.

Durante o operativo policial, tamén se interviñeron máis de 1.100 euros en efectivo, así como un vehículo de alta gama utilizado polos detidos para o seu desprazamento e transporte do material subtraído.

Os arrestados están acusados dos delitos de roubo e pertenza a grupo criminal.

A investigación permitiu, ademais, relacionar a dous dos detidos con antecedentes policiais por feitos similares de roubo de cable de cobre en distintas localidades.