Deteñen na Coruña un ciberdelincuente especializado en estafar pemes
Ao arrestado atribúenlle o desvío de diñeiro de empresas cara a contas controladas pola organización criminal e que foran creadas con identidades falsas con documentación subtraída
A Garda Civil e a Ertzaintza, no marco dunha operación conxunta, detiveron na Coruña un ciberdelincuente que cualifican como altamente activo como presunto responsable de múltiples estafas cometidas contra pequenas e medianas empresas de Euskadi, Aragón, Baleares, Madrid, Cataluña e Valencia.
A investigación permitiu localizar e deter ao presunto autor, de 50 anos e nacionalidade nixeriana que presuntamente desenvolvía a súa actividade delituosa como integrante dun grupo criminal organizado con presenza en distintas provincias españolas, segundo sinalan as autoridades nun comunicado.
O agora detido adoptaba elevadas medias de seguridade e anonimización para dificultar a súa identificación, localización e detención, chegando a operar durante anos utilizando identidades falsas e documentación subtraída a terceiras persoas, algunha delas xa falecida.
Utilizaba esa documentación para abrir presencialmente contas bancarias e contratar tarxetas SIM, ferramentas esenciais para a execución de estafas e para evitar deixar un rastro directo da súa actividade criminal.
O método empregado polo detido consistía principalmente na técnica coñecida como man in the middle, considerada unha das modalidades máis sofisticadas da ciberdelincuencia empresarial. A través da interceptación de comunicacións reais entre empresas, principalmente mediante correo electrónico, os autores modificaban os números de contas bancarias sen levantar sospeitas, conseguindo desviar pagamentos a contas controladas pola organización criminal.
Para iso empregaban técnicas de enxeñería social baseadas na manipulación e a xeración de confianza entre as vítimas. As pequenas e medianas empresas constitúen un obxectivo especialmente vulnerable debido á súa estrutura máis áxil, a menor implantación de protocolos de seguridade e a relación directa entre empregados e provedores.
Un correo electrónico aparentemente lexítimo, unha chamada realizada no momento adecuando ou unha falsa situación de urxencia eran suficientes para inducir ás vítimas para realizar transferencias bancarias que acababan nas contas controladas polos ciberdelincuentes.
A detención realizouse durante o rexistro do inmoble no que residía actualmente na Coruña, onde os axentes interviñeron diversos dispositivos informáticos, teléfonos móbiles, tarxetas SIM, documentación subtraída, tarxetas bancarias a nome de terceiras persoas, unha micro cámara espía e outros efectos relacionado coa actividade delituosa.
As pescudas realizadas no marco da cooperación policial apuntan a que o arrestado formaba parte dun grupo criminal estruturado en células distribuídas por distintas provincias da xeografía española, o que lles permite executar múltiples ataques, dispersas rapidamente os fondos obtidos e dificultar a acción policial.
Ata o momento, os investigadores lograron esclarecer 22 delictos, logrando recuperar preto de 160.000 euros tras o bloqueo de distintas contas bancarias.
Ao detido atribúenselle os delitos de pertencía a grupo criminal, estafa continuada, descubrimento e revelación de segredos, falsificación de documentos privados, usurpación de estado civil e branqueo de capitais.
