Deteñen en Vigo e Nigrán tres membros dun grupo criminal con 15 quilos de droga

A Policía Nacional detivo tres membros dun grupo criminal dedicado ao tráfico de drogas, entre eles o líder da organización, durante a operación Zafiro desenvolvida en Vigo.

O operativo permitiu intervir preto de 15 quilos de cocaína e marihuana, varios vehículos de alta gama e diñeiro en efectivo.

Distribución entre Galicia e o norte de Portugal

A investigación comezou hai varios meses, cando os axentes tiveron coñecemento da actividade dunha rede que se dedicaba á distribución de drogas por distintos puntos de Galicia e do norte de Portugal. O grupo transportaba os paquetes de cocaína e marihuana por todo o noroeste peninsular, aínda que en ocasións eran os propios clientes quen acudían a comprar.

O líder era o encargado de organizar os envíos, empregando un coche para ocultar a mercadoría e outro como lanzadeira, conducido por el mesmo. Ademais, para evitar sospeitas no momento da entrega, utilizaba un patinete eléctrico co que se desprazaba discretamente.

Rexistros en Vigo e Nigrán

O operativo desenvolveuse este xoves, cando os investigadores detectaron preparativos para un novo transporte de droga. A Policía interceptou o vehículo e localizou tres quilos de cocaína ocultos no seu interior. Pouco despois detivo os outros dous integrantes do grupo, entre eles o líder.

Realizáronse dous rexistros, un nunha nave industrial de Vigo e outro nun domicilio de Nigrán.

Na vivenda atopáronse 5.000 euros en efectivo, unha máquina de contar diñeiro e un dos vehículos empregados polo grupo. Na nave localizáronse un quilo de cocaína, máis de dez quilos de marihuana listos para o consumo, material para pesar e envasar e outros 2.000 euros.

A Policía calcula que esta rede podía distribuír ata 50 quilos de droga cada mes. Os detidos pasarán previsiblemente este sábado á disposición xudicial, mentres a investigación continúa aberta e non se descartan novas detencións.