Máis de 30 quilos de cocaína agochados nun coche aparcado no hospital Cunqueiro de Vigo

A Policía Nacional detivo en Vigo os dous presuntos responsables dunha organización criminal dedicada ao tráfico de drogas e incautouse de  33 quilos de cocaína e 41 de haxix.

O operativo culminou este xoves, cando os axentes da Brigada Central de Estupefacientes (UDYCO) da Comisaría de Vigo-Redondela confirmaron que os investigados empregaban o aparcadoiro do hospital Cunqueiro de Vigo para agochar a droga nun vehículo que actuaría como ‘rocho’.

Este coche quedaría estacionado no lugar e a organización accedería a el para deixar ou recoller a mercancía cando o precisasen.

A mediodía, o principal investigado accedeu ao aparcadoiro co seu coche e achegouse ao vehículo estacionado. Nese momento, os axentes interceptárono e rexistraron os dous vehículos, ambos preparados para ocultar substancias estupefacientes.

No interior dun deles atoparon 30 paquetes, cada un con algo máis dun quilo de cocaína, e outro quilo de haxix. En paralelo, outro membro da organización foi detido no barrio do Meixoeiro con 40 quilos de haxix no seu coche.

Os axentes tamén rexistraron un domicilio, onde atoparon unha báscula grande e unha máquina para envasar ao baleiro.

A maxistrada do Xulgado de Instrución número 1 de Vigo, en funcións de garda, decretou o ingreso en prisión provisional, comunicada e sen fianza dos dous detidos.

Outra operación contra o tráfico polo miúdo

Ese mesmo día, a Policía desenvolveu outra intervención nun punto negro da cidade onde se vendía droga a consumidores.

Na actuación detiveron a principal sospeitosa, aprehenderon pequenas cantidades de cocaína e haxix preparadas para a súa distribución, 685 euros en efectivo, material para a elaboración e distribución da droga, e diversas anotacións de transaccións.