Detectan unha vertedura na fonte de San Xosé en Parga

A fonte de San Xosé é un afamado manancial situado en Parga, pero, ollo, non se recomenda consumir polo momento a súa auga logo de detectar unha vertedura.

"Os veciños avisaron o Concello de que detectaban manchas na auga e que mesmo con cheiro a hidrocarburos. A sorpresa foi cando levantamos a arqueta porque estaba completamente manchado de hidrocarburos".

Veciños do lugar e tamén de concellos lindeiros, así como condutores que pasaban pola zona, acudían aquí a diario coller auga. Este é un manancial moi concorrido e agora os veciños están á espera de coñecer o resultado das analíticas encargadas polo concello. Tomaron mostras tanto pra comprobar a potabilidade da auga como para detectar a presenza de hidrocarburos.

"Ven xente de Parga, de Guitiriz e de todos os arredores".

A vertedura ten controversia. Chama a atención a concentración de hidrocarburo que se detectou na arqueta e tamén o feito de que alguén está a arrincar os carteis que alertan de que a auga non é potable. Este é xa o terceiro.

"Non sabemos xa que pensar. Primeiro que apareza a vertedura nunha arqueta sellada e que despois desaparezan todos os avisos que poñemos...".

"Isto é unha vergoña. Algo raro é porque o gasóleo non chega así como así".

Á espera dos resultados das analíticas, os veciños confían en que o intenso caudal do manancial, derivado das choivas dos últimos días, contribúa á limpeza da fonte.