Desmantelan o cuartel da Garda Civil de Trasmiras
A Subdelegación do Goberno di que as instalacións, que son municipais, atópanse nun estado deplorable e que supón un risco para a seguridade e a saúde laboral
O alcalde de Trasmiras asegura que lle ofreceu outro edificio do concello e restaurar o actual pero que non recibiu resposta
O peche do cuartel de Trasmiras parece definitivo. Este xoves unha empresa de mudanzas retirou xa das instalacións municipais as pertenzas dos gardas civís que prestaban servizo neste concello limiao e no de Sarreaus. A veciñanza está indignada, séntense inseguros e temen que aumenten os roubos e a delincuencia.
O cuartel de Trasmiras quedou desmantelado. Os augurios da veciñanza cumpríronse, xa non teñen o servizo da Garda Civil e están indignados temen que aumenten os roubos e a inseguridade.
Dende a Subdelegación do Goberno din que o peche se debe a unha cuestión de seguridade laboral, polo estado deplorable, engaden, do cuartel, que supón un risco severo. Por este motivo trasladaron os axentes a Verín e Vilar de Barrio.
A Subdelegación insiste en que o servizo quedará garantido con oficinas móbiles de atención ao cidadán e coa presenza de patrullas nos concellos de Trasmiras e Sarreaus, aos que este cuartel cubría.
O Concello ofreceu outro edificio municipal mentres non se rehabilitaba este, pero, asegura, non recibiu resposta. Na provincia de Ourense, co peche deste cuartel, quedan 31.
