Descenden as hospitalizacións e os contaxios da covid-19 en poboación de risco

A evolución da covid en Galicia mellorou estes últimos días cun descenso importante de hospitalizados. Os últimos datos notifican un total de 781 ingresos, 69 menos ca o día anterior. 
A área sanitaria máis afectada segue sendo a da Coruña, onde a covid contribúe na saturación das urxencias.

Desde hai catro días as hospitalizacións en planta baixaron en máis de 150 ingresos. Agora roldan os 750 pacientes, e nas UCI esta foi unha semana bastante estable, con cifras arredor dos 30 críticos de hoxe.

Unha vez máis a área da Coruña encabeza os ingresos, con 10 en coidados intensivos e 160 en unidades convencionais. Esta situación pouco ten que ver coa do verán pasado a estas alturas cando na Coruña había en total 24 pacientes contaxiados.

As consecuencias nos hospitais maniféstanse xa desde a porta de entrada, para os pacientes coa covid e para o resto, como asegura a médica de Urxencias do CHUAC, Uxía Fernández Robelo.

"Están saturadas as urxencias e estamos colapsados nós. É unha situación insostible, neste momento. Non é de risco como tal pero si que agora mesmo non se pode traballar ben, os pacientes teñen moitas horas de espera, tardan moito tempo en ingresar e iso é un risco para todos. "

Cunha incidencia acumulada en maiores de 60 anos por enriba dos 1.350 casos por cada 100.000 habitantes, os ingresos maioritarios que se están dando son nesta franxa de idade porque a covid interfire noutras patoloxías. 

Esa xente moita ingresa. Segue habendo pneumonías, insuficiencias respiratorias e segue habendo xente con moitas patoloxías que se descompensan por iso. Pero vemos moita xente nova, non con problemas respiratorios, con cadros de gastroenterite causados polo virus.

Aínda que comezan a baixar os contaxios neste colectivo, desde Sanidade insístese na responsabilidade individual de protexer os máis vulnerables nas xuntanzas do verán. Nas últimas horas notificáronse 16 falecementos de persoas maiores infectadas.