Descenden a 703 os pacientes hospitalizados por covid, mentres aumentan os casos activos

Os pacientes hospitalizados pola covid-19 en Galicia descenden a 703, que supoñen nove menos ca o día anterior, mentres que os casos activos cambian de tendencia e aumentan ata os 16.728, que implican 616 máis, despois de detectarse outros 1.572 novos contaxios. A taxa de positividade sobe lixeiramente ata un 32,7 %.   

As persoas hospitalizadas na UCI baixan a 21, e son 682 os pacientes que están ingresados nas unidades convencionais, mentres que 16.025 persoas permanecen en seguimento nos seus domicilios. 

Segundo o último informe actualizado polo Ministerio de Sanidade este pasado martes, 3 de maio, adaptado ao novo sistema de vixilancia da covid-19 centrado en poboación vulnerable, a incidencia acumulada a 14 días en Galicia en maiores de 60 anos aumenta a 1.332,65 casos por 100.000 habitantes, mentres que a media nacional sobe a 790,28. 

As vítimas da pandemia pola covid-19 en Galicia aumentan a 3.366, despois de notificar a Consellería de Sanidade este xoves outros dez falecementos de pacientes con patoloxías previas. En concreto, o pasado 1 de maio morreu unha muller de 93 anos de idade na área sanitaria de Ferrol e o día 2 faleceu outra de 98 anos na de Lugo, A Mariña e Monforte de Lemos. Os outros oito decesos producíronse o 3 de maio: na área da Coruña e Cee, unha muller de 85 anos; na de Lugo, dous homes de 81 e 90 anos; na de Ferrol, dúas mulleres de 72 e 90 anos; na de Ourense, outra de 98; na de Santiago e A Barbanza, un home de 90 anos, e na de Vigo, outro home de 96 anos.