Descartan evacuar 9.000 persoas ao baixar o caudal do Mondego en Coímbra
A situación en Portugal está tranquila pero aínda hai tres ríos en risco máximo
O mosteiro de Santa Clara a Velha rodeado de auga. REUTERS/Pedro Nunes
A Autoridade Nacional de Emerxencias e Protección Civil de Portugal (ANEPC) descarta a evacuación preventiva de 9.000 persoas na zona de Coimbra tras mellorar a situación do río Mondego, que este sábado continúa en observación.
As autoridades tomaron a decisión a última hora do venres ao comprobar que non se cumpriron os peores prognósticos e o caudal na Baixa da cidade non chegou a desbordar.
"Hoxe o día amenceu con sol. Non se agardan precipitacións relevantes, polo que hoxe é un día de recuperación", declarou a EFE MIguel Oliveira, oficial de operacións da ANEPC.
O responsable de emerxencias asegurou que a situación no país está "tranquila" e que a previsión para esta xornada é "que os caudais sigan baixando" e volver "aos poucos" á normalidade.
Aínda así, matizou que as concas dos ríos Taxo (que desemboca en Lisboa), Mondego e Sado (que pasa polo distrito de Setúbal) se manteñen en risco máximo de inundación e requiren dun "seguimento fino".
Barricada na igrexa de Santa Cruz, en Coímbra. REUTERS/Pedro Nunes
Noite tranquila
A ANEPC rexistrou dende a pasada noite e durante a madrugada 37 incidencias, relacionadas principalmente con caídas de árbores.
"Foi unha noite relativamente tranquila", concluíu.
Debido ás condicións meteorolóxicas, este sábado segue interrompida a conexión ferroviaria entre Lisboa e Porto, e hai limitacións nos servizos rexionais de varios puntos do país.
As alertas pola situación do Mondego saltaron o mércores, cando as autoridades alertaron do risco de desbordamento e decidiron evacuar preventivamente 3.600 persoas nas localidades de Coimbra, Montemor-o-Velho e Soure, no centro do país.
Na tarde dese día, a ruptura dun dique fixo que o río desbordase por unha das súas beiras á altura de Casais, preto da localidade de Coimbra.
Este venres, a ANEPC anunciou que se mantiñan as alertas ante novos desbordamentos, que poderían afectar á Baixa de Coimbra, e que expuñan a posibilidade de evacuar a 9.000 persoas, que finalmente decidiron non levar a cabo.
A situación mellorou nas últimas horas. REUTERS/Pedro Nunes
