Desarticulada unha rede familiar de tráfico de drogas en Melide e Arzúa con cinco detidos
O Xulgado de Instrución nº 1 de Arzúa decretou o ingreso en prisión para un deles e liberdade con cargos para os outros catro
As investigacións confirmaron que o grupo utilizaba un establecemento hostaleiro en Melide como tapadeira para a venda directa de cocaína
A Garda Civil desmantelou, coa detención de cinco persoas, unha rede familiar de tráfico de drogas en Melide e Arzúa que utilizaba un establecemento hostaleiro na primeira das localidades como tapadeira desde a que abastecían a catro comarcas galegas.
Os detidos son un home de 30 anos e a súa parella de 27 anos, ambos os veciños de Arzúa; unha muller de 55 anos e outra de 23 anos, de Melide; e un home de 50 anos, de Vilanova de Arousa (Pontevedra), identificado como o presunto provedor da droga.
Todos foron postos ao dispor do Xulgado de Instrución nº 1 de Arzúa, que decretou o ingreso en prisión para un deles e liberdade con cargos para os outros catro.
Na operación, do Equipo ROCA de Santiago de Compostela en colaboración co Posto da Garda Civil de Melide, realizáronse seis rexistros domiciliarios en inmobles e locais vinculados aos investigados.
Durante estas intervencións, incautáronse máis de 180 gramos de cocaína (127 gramos en roca e 42 bolsitas listas para a súa venda cun peso aproximado de 41 gramos); 1,5 quilos de cogollos de marihuana e 22 bolsitas de marihuana dun total de 109 gramos; e catro bolsitas de haxix cun peso de 40 gramos.
Ademais, interviñéronse 37.000 euros en efectivo, 30.000 deles selados e envasados ao baleiro ocultos na tapa dunha persiana; unha báscula de precisión, dous vehículos e cinco teléfonos móbiles, xunto con outros dispositivos electrónicos.
Tamén se localizou unha plantación 'indoor' de marihuana nunha das vivendas.
A operación iniciouse o pasado mes de xaneiro tras detectarse unha constante trasfega de potenciais consumidores nun establecemento hostaleiro en Melide, utilizado como punto de venda encuberto desde o que se abastecía de cocaína e outras substancias ás comarcas de Terras de Melide, Arzúa, Ulloa e Deza.
As investigacións confirmaron que o grupo utilizaba o establecemento hostaleiro en Melide como tapadeira para a venda directa de cocaína, con entregas rápidas e contacto directo cos consumidores.
A estrutura criminal atopábase xerarquizada, con funcións claramente repartidas, e xeraba beneficios económicos non xustificables legalmente, o que, xunto coa utilización de diñeiro en metálico oculto, motivou a atribución dun delito de branqueo de capitais.
Aos arrestados impútanselles tamén os delitos de tráfico de drogas, pertenza a grupo criminal, branqueo de capitais e resistencia e desobediencia a axentes da autoridade.
A Garda Civil destaca a considerable alarma social que esta actividade delituosa xerara na zona, polo que a operación tivo un notable impacto, non só pola implicación dun local público, senón polo amplo alcance comarcal da rede de distribución desarticulada.
