Desartellan unha organización de estafadores que branqueaba o diñeiro en criptomoedas

A Garda Civil desmantelou unha organización que presuntamente estafou 190 vítimas en toda España facéndose pasar por un banco, todo antes de branquear o diñeiro defraudado mediante a compra de criptomoedas, informou este mércores a Comandancia de Madrid da Benemérita.

As detencións producíronse nas provincias da Coruña, Pontevedra, Madrid, Barcelona e Lleida, onde se realizaron rexistros e se atopou abundante documentación bancaria, anotacións de criptomoedeiros, efectos comprados co diñeiro defraudado e todo tipo de material informático.

Nesta Operación Black Crypto foron detidas 40 persoas de 18 a 32 anos e nacionalidades española, marroquí, arxentina, holandesa e senegalesa. Case todas elas contaban con antecedentes policiais por delitos similares.

Os arrestados están acusados de estafar máis de 300.000 euros a persoas que enganaban suplantando a identidade dun banco mediante correos electrónicos e chamadas de teléfono nas que lles solicitaban os seus datos e claves persoais.

A investigación iniciouse o pasado mes de febreiro por mor de tres denuncias presentadas na localidade madrileña de Majadahonda e foi dirixida polo Equipo de Investigación Tecnolóxica (EDITE) da Unidade de Policía Xudicial e a Garda Civil.

Segundo puideron comprobar os axentes, existía unha organización que se facía pasar por unha entidade bancaria a través do envío de correos electrónicos masivos, mensaxes de móbil e chamadas en que notificaban ás vítimas o bloqueo temporal da súa conta, polo que lles solicitaban a verificación dos seus datos mediante a ligazón a unha web fraudulenta.

Para materializar a fraude con estes métodos, coñecidos como phising, smishing ou spoofing, transferían o diñeiro roubado ás vítimas a contas bancarias abertas por "mulas", as cales captaban nun sistema piramidal por cantidades que oscilaban entre 100 e 1.500 euros para que creasen as contas vía Internet.

Os investigados lograban burlar todos os sistemas de seguridade bancarios e conseguían subtraer ás vítimas cantidades mínimas de case 2.000 euros e máximas de 7.000. 

As pescudas levaron á Garda Civil a outras provincias como Barcelona ou Lleida, onde se detivo os xefes da organización e se xestionaban os beneficios da armazón, que branqueaban con importantes investimentos en criptomoedas.