Desaloxan de madrugada 40 veciños de San Cibrao a causa dun incendio forestal

Uns 40 veciños de 14 casas foron desaloxados por precaución no municipio lucense de Cervo, como consecuencia dun incendio forestal na zona de Río Covo, en San Cibrao, que comezou sobre as catro da madrugada, aínda que a maioría puideron regresar xa aos seus domicilios.

Segundo a información facilitada polo Centro Integrado de Atención ás Emerxencias de Galicia (CIAE), a Garda Civil procedeu ao desaloxo das casas da urbanización de Río Covo por mor da proximidade das lapas.

Tamén foron desaloxados os habitantes de varias vivendas na zona Pedrosa e os usuarios da residencia de San Cibrao quedaron confinados, tamén por precaución.

Segundo informa o 112, na actualidade o lume está controlado e a maior parte das persoas desaloxadas puideron regresar xa ás súas casas, salvo seis veciños da zona de Pedrosa.

A alcaldesa de Cervo, Dolores García, confirmou que case todos os veciños están xa nos seus fogares e que o incendio xa está "practicamente controlado".

"Non hai estragos en ningunha vivenda" provocados polas lapas, explicou a rexedora, quen recoñeceu que o lume chegou a estar moi preto.

"Algunha faísca prendeu nunha palmeira, pero nada máis. Foi polo vento", afirmou García. 

En canto aos afectados, precisou que todos puideron regresar xa aos seus fogares, salvo “seis veciños de dúas casas”, que resultaron afectadas. Esas dúas vivendas aínda “están cubertas polo fume”, de modo que “se lles recomendou” aos seus ocupantes que saísen. “Situámolos nun hotel e nunha cafetería para que estivesen cómodos. Só polo fume”, insistiu.

A Consellería do Medio Rural matizou a EFE que o lume en realidade permanece “activo”, aínda que a súa evolución é “favorable”. Nos traballos de extinción traballan nestes momentos tres axentes, sete brigadas, outras tantas motobombas e un técnico.

O lume comezou ás 04:03 horas da pasada madrugada e, de momento, calcinou entre 5 e 6 hectáreas, segundo cálculos provisionais de Medio Rural.