Máis de corenta vivendas desaloxadas polo incendio dun garaxe en Salvatrerra de Miño

Un incendio obrigou a desaloxar tres bloques de vivendas en Salvaterra de Miño. O lume iniciouse no garaxe que comparten, e os bombeiros tiveron que traballar durante varias horas para extinguilo.

O incendio orixinouse pouco antes das dúas da mañá no garaxe que comparten tres bloques de vivendas da rúa Raíña dona Urraca de Salvaterra. O fume obrigou a desaloxar os tres edificios, en total preto de medio cento de vivendas, e os veciños non puideron regresar ás súas casas ata pasadas as seis da mañá.

Con poucas horas de sono, os veciños de tres bloques de corenta e seis vivendas en Salvaterra de Miño agardaban información sobre o estado dos seus vehículos. O presidente da comunidade escoitou un ruído ás dúas da madrugada e comprobou ques saía moito fume negro. Foi quen alertou o resto dos veciños para que saíran o antes posible da casa.

Á súa chegada os bombeiros do Porriño e os de Ponteareas atoparon unha situación complicada. So eran seis efectivos dispoñibles e tiveron que pedir reforzo ao parque do Morrazo. O seu obxectivo foi evitar que o lume se estendera ás vivendas por iso segundo explica Dani Bar, cabo dos Bombeiros do Porriño,  atacaron o lume dende o acceso interior do inmoble ao garaxe. Había moita calor acumulada e pouca visibilidade  polo que foi difícil atopar o foco. Dous coches quedaron calcinados, outros catro e dúas motos afectados polo lume e o resto por fume. O incendio tamén provocou problemas coa rede eléctrica e a auga.

Toca agora avaliar danos, porén os veciños aínda non puideron acceder ao garaxe, xa que os técnicos analizan os danos estruturais. Noite longa tamén na rúa Ecuador de Vigo. O incendio noutro garaxe obrigou ao desaloxo de varias vivendas. Unha muller embarazada tivo que ser evacuada ao hospital Cunqueiro por inhalación de fume.