Desactivado o nivel 2 de alerta nos incendios do Courel e de Valdeorras

Na tarde deste venres quedaron desactivadas todas as alertas por proximidade das lapas ás vivendas tanto no Courel como en Valdeorras.

Nesta situación estaban os núcleos de Parada dos Montes, Carballal e Gamiz, en Folgoso, e o de Busto na Pobra do Brollón. En ambos os dous concellos, as lapas calcinaron máis de 11.000 hectáreas.

Tamén se atopaba en alerta a poboación de Candeda, en Carballeda de Valdeorras. O lume declarado nesta zona, que xa queimou 10.500 hectáreas, afecta o Parque Natural da Serra da Enciña da lastra.

Nas últimas horas a situación é máis tranquila. Arestora, os traballos dos equipos contraincendios céntranse nas zonas de máis difícil acceso da alta montaña.