Desaconsellan o baño na praia viguesa da Calzoa por contaminación
As analíticas do Servizo Galego de Saúde (Sergas) detectaron unha cantidade excesiva de materia fecal na auga
Imaxe de arquivo de Turismo.gal
A Consellería de Sanidade detectou nas analíticas do Servizo Galego de Saúde (Sergas) unha cantidade excesiva de materia fecal nas augas da praia viguesa da Calzoa, polo que se desaconsella o baño.
Os controis foron realizados o pasado luns, 24 de agosto, e reflicten unha concentración de E. coli superior ás 2.005 unidades na parte dereita do areal e de 831 na zona esquerda, oficialmente habilitada para cans.
Trátase dunha presenza de E. coli, en ambos os casos, moi superior aos niveis considerados seguros para o baño.
A noticia sucede a outra de igual natureza coñecida este martes, cando se desaconsellou o baño tanto na zona central de Samil, o areal máis concorrido de Vigo, como na praia da Punta.
Nos dous casos detectouse nas analíticas realizadas o pasado domingo, 23 de agosto, unha presenza excesiva de materia fecal, que o Concello atribuíu nun comunicado ás intensas chuvias dos últimos días.
No caso da praia de A Punta é o segundo episodio desta natureza que se produce, e no conxunto das praias de Vigo xa se rexistraron varios no que vai de verán: aos dos últimos dous días hai que sumar outros ocorridos en praias das illas Cíes e en areais de Alcabre e Teis.
