López Acuña: "A máscara debe volver ser obrigatoria e hai que illar os positivos"
O epidemiólogo considera que a repunta de contaxios e hospitalizacións por covid-19 se debe á relaxación das medidas de protección, á maior capacidade de transmisión das novas variantes e ao decaemento da eficacia das vacinas
López Acuña cre que foi un erro gripalizar a xestión da pandemia
Daniel López Acuña, exdirector de Acción sanitaria en Situacións de Crise da OMS, alerta da repunta de contaxios, hospitalización e mortes por covid-19 e recomenda recuperar a obriga do uso da máscara e volver illar os positivos asintomáticos.
"Non creo que abonde cunha recomendación. Considero que a máscara debe volver ser obrigatoria e que tamén hai que volver illar os positivos ata que negativicen".
Nunha entrevista na Radio Galega, o epidemiólogo aposta tamén por administrar canto antes a dose de reforzo da vacina contra a covid-19 aos maiores de oitenta anos. Considera que unha das causas da repunta das hospitalizacións é que co paso do tempo diminúe a eficacia das vacinas.
"Non considero que debamos seguir esperando para poñer unha cuarta dose de reforzo aos maiores de 80 anos e ás persoas que viven en residencias xeriátricas, tal como recomendou o Centro Europeo para o Control de Enfermidades. Non esperar ao outono, facelo xa".
Para López Acuña, unha das causas principal do incremento dos contaxios é a relaxación das medidas de protección.
"Cometeuse un erro ao gripalizar a xestión da pandemia; cometeuse un erro ao deixar de illar os positivos asintomáticos e cometeuse un erro ao suprimir o uso da máscara de interiores cando a incidencia era aínda alta. Por iso estamos tendo estas repuntas".
O epidemiólogo critica a inacción das autoridades sanitarias ante o aumento da incidencia, da hospitalización e da mortaldade nas últimas semanas.
"Relaxáronse de máis as autoridades sanitarias estatais e autonómicas e están un tanto de brazos cruzados cando estamos ante repuntas importantes e tivemos unha letalidade excesiva nos meses de maio e de xuño con case 6.000 defuncións en España".
López Acuña lembra que a evolución da pandemia en España se dá nun contexto de repunta importante da transmisión do coronavirus en varios países de Europa e en toda América, en gran media, asegura, como resultado das novas variantes BA.4 e BA.5 e ao decaemento da eficacia da protección das vacinas.
