A seca deixa ao descuberto as ruínas das casas que agochou a presa das Forcadas

A falta da chuvia deixou ao descuberto parte das ruínas da antiga aldea de Cortiñas de Abaixo, na contorna da presa das Forcadas. O nivel da auga sitúase actualmente no 51,65 % de capacidade do encoro, o que permite volver contemplar restos das vivendas que quedaron baixo auga coa construción da presa nos anos 60. 

No lugar había once ou doce casas, ademais dun muiño e un forno que utilizaban os veciños. Parte das antigas estruturas, como pedras das vivendas e restos dos camiños, son agora visibles na beira do encoro. 

A aparición destes vestixios está a atraer antigos veciños e familiares, moitos deles procedentes de Ferrol, que se achegan ata as Forcadas para lembrar como era o lugar antes da construción do encoro. 

A expropiación das terreas obrigou moitas familias a abandonar Cortiñas de Abaixo. Algúns veciños marcharon a Ferrol para buscar traballo, mentres outros conservaron na memoria os anos vividos naquela zona, onde tamén había actividades tradicionais como a pesca das troitas. 

Agora, a seca permite recuperar temporalmente unha parte desa paisaxe desaparecida e espertar a memoria e morriña dos que viviron alí antes de que a auga cubrise para sempre o antigo lugar.