CSIF, UXT e CCOO convocan mobilizacións en Galicia por unha suba salarial no sector público

Os sindicatos CSIF, UXT e CCOO anunciaron este luns a convocatoria de mobilizacións o xoves 30 de outubro en toda Galicia para reclamar unha suba salarial para o persoal empregado público.

As protestas, baixo o lema “Negociación, subida salarial e mellora dos servizos públicos”, forman parte dun calendario de accións que podería culminar cunha manifestación e unha folga xeral en decembro se o Goberno “segue bloqueando a negociación”, segundo informaron nun comunicado conxunto.

En Galicia, as concentracións terán lugar ás 12:00 horas diante da Delegación do Goberno na Coruña e fronte ás subdelegacións en Lugo, Ourense e Pontevedra. As organizacións sindicais chaman a participar ao conxunto do persoal público, tanto da Administración Xeral do Estado como das administracións autonómica e local.

As centrais denuncian que o Goberno debe 1.860 millóns de euros en atrasos salariais correspondentes aos últimos dez meses, unha cifra que consideran “un agravio económico” e mostra da “débeda histórica co persoal público”. Reclaman a apertura “inmediata” dunha negociación dun novo acordo salarial que permita recuperar o poder adquisitivo e mellorar as condicións laborais.

Entre as principais demandas figuran un acordo plurianual de recuperación salarial, unha cláusula de revisión automática vinculada á inflación, un plan de reforzo dos cadros de persoal e melloras nas condicións de xubilación, equiparación salarial e modernización do marco laboral do sector público.

UXT, CSIF e CCOO subliñan que “a falta de resposta do Goberno deixa a mobilización como única vía” para garantir uns servizos públicos de calidade e unhas condicións laborais dignas para o persoal que os sostén.