Cristofer González, fillo dun tripulante do Villa de Pitanxo: "Non sabemos nada da armadora, non dan a cara"

As familias dos tripulantes do Villa de Pitanxo están indignadas coa suspensión da busca. Non entenden a postura do Canadá, pero tampouco a de España. Cristofer González é o fillo dun dos mariñeiros e foi entrevistado polo informativo Bos días. Destacou que pasan os días e seguen sen información, que pasaron de estar tristes a estar enfadados.

Sobre se están a recibir información por parte da armadora, Cristofer manifestou que tiñan que estar dando a cara e que non saben nada deles. Afirmou que o resto dos familiares tampouco teñen información, e iso fainos desconfiar.

Cristofer remarcou que el aínda non sabe se o seu pai está entre os desaparecidos ou entre os falecidos. Queixouse unha vez máis de que non teñen ningunha información oficial e dixo que o Goberno ten que tomar medidas para que se continúe coa busca. 

Dixo que a última conexión que había no móbil do seu pai foi ás catro da madrugada, que estaba no camarote e que non podía durmir polo forte temporal que había. Cristofer destacou que nunca lle escoitara dicir ou demostrar que tiña medo por algo, pero que ese día estaba "moi asustado".