Controlado o incendio de Brión tras queimar 4 hectáreas
Iniciouse o martes pola tarde na parroquia de Bastavales, preto do municipio de Ames
Os servizos contrincendios dan por controlado o foco declarado en Ribas de Sil (Arquivo/Rosa Veiga/Europa Press)
O incendio forestal declarado na tarde do pasado martes no municipio coruñés de Brión quedou controlado sobre as 00:30 horas da madrugada do mércores tras queimar unhas catro hectáreas.
Segundo informa a Consellería do Medio Rural, o incendio iniciouse ás 19:20 do martes na parroquia de Bastavales, nas proximidades do municipio limítrofe de Ames.
Nos labores para apagar as chamas traballaron de forma acumulada: cinco helicópteros, dous avións, 16 motobombas, 21 brigadas e 10 axentes, entre outros.
Continúa controlado o de Ribas de Sil
Mentres, continúa controlado desde o martes o incendio rexistrado no municipio lucense de Ribas de Sil, parroquia de Soutordei, tras afectar a unha superficie de 180 hectáreas.
O lume iniciouse na tarde do sábado. Foi necesario declarar a Situación 2 de forma preventiva pola súa proximidade ao núcleo de Chenzas, unha medida operativa que quedou desactivada na madrugada do domingo.
Ademais, o pasado martes quedou extinguido o incendio forestal rexistrado nos concellos coruñeses de Vimianzo e Laxe, que se fusionou nun único lume, tras afectar a unha superficie de 228,58 hectáreas, das que 177,8 foron de monte arboredo e os 50,78 restantes de raso.
