Continúa o rescate dos 14 españois localizados entre os cascallos e a cifra de desaparecidos elévase a 133

Segundo o último balance do Ministerio de Asuntos Exteriores os equipos de rescate seguen traballando no lugar onde foron localizados os 14 españois atrapados polos cascallos. Tal e como asegurou o ministro, José Manuel Albares, a prioridade é poder acceder ata eles e tanto o equipo da UME como os Bombeiros da Comunidade de Madrid desprazados xa están na zona. 

O número de españois desaparecidos elévase a 133 mentres que o de vítimas mortais mantese en 5. O ministro reiterou que todas as liñas de emerxencia consular, que se poden consultar en redes sociais do Ministerio e da Embaixada en Caracas, están abertas e pídeselles aos españois en Venezuela que as utilicen.

Albares destacou que o primeiro paquete da Axencia Española de Cooperación Internacional para o Desenvolvemento (AECID) con material de primeiros auxilios, como mantas, esteiras ou pastillas potabilizadoras tamén foi entregado ás autoridades venezolanas.

O avión da Forza Aérea española aterrou este venres en Venezuela con 59 efectivos da UME, dous enxeñeiros do Exército de Terra e oito unidades caninas para apoiar as autoridades venezolanas nas tarefas de busca e rescate. No mesmo avión viaxaron 40 efectivos do Equipo de Emerxencia e Resposta Inmediata da Comunidad de Madrid: bombeiros especialistas en rescate en estruturas colapsadas e profesionais do Servizo de Urxencias Médicas (SUMMA112) xunto a catro cans da Unidade Canina. Na aeronave desprazouse tamén un equipo da Axencia Española de Cooperación Internacional para o Desenvolvemento (AECID) co material de primeiros auxilios.