Continúa a busca do fuxitivo de Poio
O home de 35 anos ten un amplo historial de roubo de vehículos, drogas e delitos contra a propiedade
Policía Local, Nacional e Garda Civil buscan un fuxitivo en Poio experto no roubo de vehículos pero que posúe todo tipo de antecedentes segundo as forzas da orde.
A última persecución e fuxida protagonizouna este mércores entre San Xoán de Poio e as Marismas de Alba. De alí fuxiu a pé coa súa compañeira deixando abandonado o vehículo que foi recuperado pola Policía Nacional e que era roubado. Ten unha ampla conduta delitiva. Foi detectado por San Salvador e comezou a fuxir a fume de carozo dos axentes atravesando pistas de terra e corredoiras, atravesou Fragamoreiras, Campañó, Ponte das Cabras ameazando a integridade de peregrinos e abraiando a veciños.
Consideran na Policía Local de Poio que o home que vivía ata hai pouco nunha vivenda ocupada ilegalmente campa ás súas anchas polo concello sobre todo polas tardes aproveitando que non hai quenda da Policía Local.
