Cómpren máis doazóns de sangue para compensar a falta de recollida do día festivo
É preciso sobre todo aumentar as reservas de 0 negativo e A positivo
Para atender a demanda dos hospitais galegos compren de 400 a 500 doazóns diarias
Pódese doar nos hospitais e nas unidades móbiles da ADO
As vacacións e os días festivos alteran o número de doazóns que se reciben regularmente para asegurar as reservas de sangue. Por iso, para compensar a falta de recollida do día 12, desde a Axencia Galega de Doazóns fan un chamamento especial esta semana. Apelan sobre todo aos doadores dos tipos 0 negativo e A positivo, que son os que teñen os niveis de reserva máis baixos.
Amais dos puntos de doazón que hai en todos os hospitais, dez unidades móbiles da Axencia Galega de Doazón de Órganos e Sangue percorren a diario a comunidade para asegurar que se manteña nun nivel óptimo a reserva de sangue e plaquetas que precisa acotío a actividade sanitaria. É un equilibrio permanentemente inestable ao tratarse dun produto perecedoiro e con altibaixos de oferta e demanda. "O sangue caduca aos 42 días e as plaquetas aos 7 días e as necesidades dos hospitais varían", explica Marisa López, directora da Axencia Galega de Doazón.
Para lograr equilibrar o máis posible todas esas variables é imprescindible a colaboración dos doadores, en especial dos que manteñen un compromiso regular. Á parte de contar sempre con eles, desde a Axencia apelan tamén aos doadores eventuais, sobre todo en semanas coma esta en que hai que incrementar un pouco o ritmo para compensar a xornada festiva.
